У ветразях уражанняў і мар

Submitted by ias on пан, 29/03/2021 - 08:10

Самым яскравым паказчыкам трывалага засваення рускай мовы замежнымі выхаванцамі з’яўляецца асэнсаваны, добраахвотны і доўгачаканы паход у тэатр.

Ідуць не ўсе. Выкладчык наўмысна заахвочвае да гэтага мерапрыемства толькі тых, хто потым, вярнуўшыся на радзіму, будзе з асалодай успамінаць пра тое, што, правучыўшыся чатыры гады ў Беларусі, усё ж такі хаця б разок дакрануўся сэрцам да чароўнасці сцэнічнага мастацтва і перажыў тыя ўзнёслыя пачуцці, якія нараджае добрая, густоўная камедыя і вонкавая раскоша ўтульнай, аздобленай золатам залы.

У тэатр выкладчык запрашае студэнтаў, якія ў належнай ступені авалодалі мовай, і гэтае запрашэнне ўспрымаецца як вышэйшая адзнака іх моўнай падрыхтоўкі. Адрозніваць адценні сэнсаў, адсочваць падтэкст і адэкватна рэагаваць на гумар зможа толькі той, хто прайшоў шлях спасціжэння мовы ў належнай ступені, якая дазваляе адчуваць сябе свабодна ў нашай моўнай стыхіі, насычанай самай разнастайнай лексікай, аздобленай прыроднай і невынішчальнай беларускасцю ў яе ўсемагчымых праяўленнях: фанетычных, лексічных, граматычных і ментальных…

У нядзелю, 28 сакавіка, у абласным драматычным тэатры ставілася камедыя “Абед для грэшнікаў”. Прэм’ера. А прэм’ера – гэта, вядома, заўсёды свята, якое арганізавалі для нашых навучэнцаў з Конга, Сірыі, Марока, Маўрытаніі, Шры-Ланкі, Кітая і Туркменістана выкладчыкі кафедры давузаўскай падрыхтоўкі і прафарыентацыі. Зацікаўленая падтрымка праявілася і з боку адміністрацыі тэатра ў асобах галоўнага адміністратара Вольгі Цімафееўны Барабанавай і касіра Таццяны Сяргееўны Смаляковай, якія пайшлі насустрач нашым памкненням, зрабіўшы значныя зніжкі на квіткі, за што мы выказваем ім словы шчырай падзякі і шанавання.

Мабыць, такой колькасці замежных слухачоў і студэнтаў з розных краін даўно не бачыў наш тэатр, бо прыйшло на спектакль агулам 35 чалавек: навучэнцы падрыхтоўчага аддзялення і студэнты 2-3 курсаў спецыяльнасцей “Матэматыка”, “Геаграфія”, “Біялогія”, “Эканоміка”. Быў запоўнены цэлы дзявяты рад і многія месцы на балконе. Нягледзячы на адметную этнічную і культурную прыналежнасць такіх розных, але ўдзячных гледачоў, гумар камедыі і адмысловая ігра акцёраў аб’ядналі і зблізілі ўсіх, прымусілі падзяліцца свежымі ўражаннямі, абмяняцца думкамі і назаўжды пакінуць для сябе цёплыя ўспаміны пра сустрэчу з высокім мастацтвам.

 

Рыгор Серыкаў,

дацэнт кафедры давузаўская падрыхтоўкі і прафарыентацыі

Фотасправаздача